اووه عدي وقت طويل
بشيك علي بطارية اللاب لاني مش عايزة اتعكنن ان مفيش شحن كفاية
ليه يوم الجمعة دايما فيه حاجة تعكنن ...دخلة رمضان ....نهاية رمضان بتبقي نهاية اقرب علاقة ليا ...شهر اربعة....معرض الزهور
انا عارفة اني بكرر الباترن في تصرفاتي ..علاقاتي بس اوبس ازاي العالم اتحشر معايا في نفس تكرار الباترن
تلت سنين
نفس الدايرة
بقيت بكره الزن ..او جايز بقيت بتحسس زياده
زيادة عن كدة؟..هروح فين تاني بجد
فتحت كيس الشوكولاتة بس اكتشفت انها قاسية زيادة ..سيبتها تفك عشان بحبها سايحة ملهاش طعم و هي قاسية مش كدة
الحقيقة معرفش دي لحظة تعافي هتضاف لطريق طويل من الصعود و الهبوط و لا دي لحظة عابرة هرجع بعدها اسوأ
بقيت بخاف من نفسي ..كتير قالولي بنخاف منك ..بختفي مرة واحدة..
بس انا كل ده كنت فاكرة اني صادقة..مش بحب حاجة غير و انا متاكدة..الموضوع وصل اني اسأل نفسي في حاجات لا ادمية
انت فعلا فعلا فعلا بتحبي السينما الايرانية
طب بتحبي شعاع الشمس
اللون الاحمر
الزجاج المعشق
و لا انت بتلوني نفسك بالوان مش لونك ..بحاجات مش انت
كنت متصورة لما يقولي تتجوزيني هنبسط...واو انا كنت فاكرة اني متأكدة اني عايزاه اكتر من اي حاجة
ازاي مشاعري تلعب معايا اللعبة الوحشة دي
محبتش حد
لسة قاسية شوية..بس هاكلها
بس انا مش مصدقة ان ايدي بدأت تتحرك علي الكيبورد تاني بخفة و بسرعة كده
وقع تحت ايدي بالصدفة و قررت اديله فرصه
مسلسل لا تطفئ الشمس
خلصت اربع حلقات
مش فاكرة ان فيه عمل اي كان نوعه ونسني بالطريقة دي
اكيد حسيت بالونس كتير قبل كدة مع كتاب فلم اغنية
بس وسط اللوب اللي انا محشورة فيها دي و حاجة تدفي قلبي لا لا تدفي روحي
ملقتش
مكدبش عيني واجعاني و الصداع نازل لغاية نص وشي
بس عقلي هادي لا لا الاهم روحي مبتتحرقش
كنت قبلها من كتر الاجهاد اللي حاسة بيه ..انا حرفيا حاسة اني مش حاسة ب رجلي
عضلاتي
دابت
كنت بنهج و انا قاعدة
اها ضيق التنفس اللي بقي بيهجم عليا ده
يا رب ما يزورني تاني
ضيق تنفس..بحس عايزة اسلخ
جلدي
شعري
اسلخ نفسي عن نفسي
اسلخ نفسي عن الوجود
اخر حتة من الشوكولاتة
باخد نفس
لازم تحس بوجودك
حد يلمسك عشان تتأكد انك موجود
او تنتنج حاجات ملموسة ..جميلة..تحس ان ليها قيمة
دي حاجة اتعلمتها الفترة اللي فاتت
اوبس يعني مطلعش البحث الحثيث عن الحب
طلع البحث عن شئ يرجك..يقولك شش انت موجود..انت هنا ..متشاف
انا لسة بتعلم كتير اوي
يا تري هقرأ الكلام ده بعدين امتي ..اكيد هضحكك عليه ساعتها
حاجة تاني اتعلمتها
انا بشتغل احسن لما بعمل شغل لجروب
عشان انا مبحبش نفسي كفاية اني اعمل شغل تحفة لنفسي عشان نفسي
الخوف بيحركني في كل طريق مشيته
ااه ريحته ضربت مناخيري
الموجة في درس التردد بتاع تالتة اعدادي في دماغي
من قبل ما اطلع فوق بلاقي نفسي تحت
و ملحقتش احكي عن المسلسل حتي
تعليقات
إرسال تعليق