غلط في المقاس
النهاردة سبعة اغسطس ااااااه معملتش شئ يذكر الشهرين اللي فاتوا من الاجازة يعني اوكيه يعني فهمنا الكلام الحلو بتاع مش ضروري الكم و غيره بس انا عارفة نفسي انا مبعملش اللي المفروض اعمله بسبب حجج فارغة زي الخوف و انا متأكدة اني في الكليه كان زماني خلصتهم و رجلي فوق رقبتي
انا حقيقي حزييينة مش عارفة اركز في الخياطة و لا الكروشيه و لا التريكو و لا التطريز و لا الخرز و لا المكرمية و لا اتعلم كنافاه و لا تطريز بالخرز و لا الايلوستريشن تاعي اللي محتاجاله شهر اقل حاجة عشان يتحسن و لا اروح الاماكن اللي هموت و اروحها و لا كمية الكتب و المواضيع اللي فايتاني لاني جاهلة و كمية الافلام و الاغاني اااااااااااااااااااااااااااااااااااااااااااااااااااااع في الاخر مش هقول المحصلة زيرو ابدا بس حقيقي واحد من عشرة المشكلة ان الحاجات الغير كاملة اوغير مثالية بتعصبني بتضايقني بعوز امسكها افكها و ارجعها زيرو و لا انها تفضل ناقصة حتة كدة و احب ابدأ الشئ اكيد و انا عارفة كل تفاصيله بس حقيقي ده المفروض يعني انا مقدرش انزل عن كدة تفاصيل كتير لازم اخد بالي منها نوع القماش نوع الخيط طب الوانهم طب انواعهم طب مقاسات الابر طب مقاسات الشئ اللي هنفذه اللي بدخل فيها في متاهات لا نهائية طب ما هو ممكن الخامة دي مع الباترون او الموديل ده متنفعش طب الحردات طب التنيات و ده كله في حالة لو اخترت باترون واحد انفذه وسط الثقب الاسود اللي مليان اشكال و الوان يعني الانسان طبيعي لوحده بيفكر بزيادة و مجال الدراسة اللي اخترته و حتي الهوايات اللي جنمبه بيجبروني افكر زيادة اكتر و اكتتتتر اللي يضايق اكتر زي ما قولت ان الاخطاء احتمالاتها كتير و ده طبيعي انا متفهمة ده عشان لسة في الاول و لازم حبة صبر كتير بس حقيقي انا يعتبر ببدأ في كله من الصفر يعني اي شئ هعمله هغلط فانا متصورة ماسورة الغلطات اللي هتطفح في وشي مع عقلي الغير ناضج النملة اللي مبيحبش يغلط حقيقي مش عايزة افضل في الدوامة دي كتير و زهقت منها عمالة بحوش بحوش بحوش في حاجات نفسي اعملها و اخلصها للاخر بس لااااا انا مش هفضل اندب بلا هدف و اينعم لو خلصت كل اسبوع مشروع خياطة و مشروع كروشيه او تريكو واحد ده كدة قليل عقبال ما الاجازة تيجي بس احسن من زيرو هبقي اسجل هنا كل يوم عشان اوري حالي اخليها تفوق لنفسها اذ كانت بتخلص و بتشتغل و لا لا
شعور جديد اتضاف للقايمة علي اساس كانت ناقصة بس يعني ايه يعني واحشني حد انا مش عارفة هو مين و مش قصدي لسة متعرفتش عليه نوو انا عقلي ذات نفسه مش عارف ايه ده مفيش ملامح مفيش تحديد اذ كان ولد او بنت حتي
هو حد و بس من غير اسم او عمر او ملامح ....عته والله عقلي قاعد فاضي و شايفني الي حد ما مستقرة الحمدلله مفيش اي حاجة تضايق مفيش مشاكل فل لااااا ازاااي يعني ازاااي ايوة انت اول ما تسمعي بيتين الشعر دول هتعيطي من الشوق لشخص انت متعرفيهوش اساسا او الاصح شخص مش موجود ايوة و هخليكي قاعدة حزينة و سرحانه و قلبك مليان حنين لحالة معينة و ذكريات عمرها ما حصلت اساسا و هخليكي تدمعي دلوقتي و تحسي ان جزء من روحك مفقود عمال يسرح في العدم و عمرك ما هتلاقيه و انك محتاجه حد يسد الفراغ اللي سابه و ان مفيش حاجة للاسف هتحل الوضع الا لو قابلتيه ممكن حضنه ساعتها يعوض الجزء ده
اهاا نفهم انه ولد ....والله اللي حاسة بيه انه مش محدد اساسا
اهاا تصنيفات حديثة
لا لا هو بس .....مقدرش احدد متدخلنيش في تفاصيل
انا نفسي اشوف رسائل البحر اوي اوي
لا لا مش هينفع احنا خدنا عهد علي نفسنا اننا نشوفه في الشتا
بس انا هموت بجد هموت و اشوفه
هيكون مين بس و هعرف لو شوفته او شوفتها او يمكن يطلع شئ ممكن يطلع بيت شعر او فلم او لوحة اشوفها اشبع و محسش بعديه بكل الفراغ ده
ليه المقاسات مبتظبتش من اول مرة يا ربي ليه لازم اغير ارقام ابر و سمك خيوط و امسح و اعدل الخطوط ليه لازم افضل اغير بني ادميين ليه مينفعش مقاس كل حاجة يظبط من اول مرة متطلعش جزمتي اللي نزلت بيها و مشيت خطوتين ضيقة عشان اضطر استحملها و هي بتجرح في رجلي كل مشوار و اضطر استحمل حبيبي الاولاني سنتين في حلقة مقفولة من الضياع و النشوة وان صاحبتي مطلعناش علي نفس الخط ليه مكنش ينفع من اول مرة بمشاعري المكثفة من غير ما تمس رجليا محيط الخيبات من غير انتظار بكل اللهفة ب الشوق و انا بجربه اول مرة ليه لازم اتعلم القلق و اكتسب خبرة في اني اشم الرفض من علي بعد قارات و اتعلم اني مستناش و احفظ دليل عدم الوقوع في الخيبات ليه لازم اتعلم ان المشاعر بتتغير و ان الاشخاص بيتغيروا ليه مينعش ندوق كل حاجة مرة و لاول مرة و نوصل لمرادنا
لو ده كله في سبيل النضج ف اللعنه علي النضج و اللي جابو
تعليقات
إرسال تعليق