عالم كاد ينهار او كاد ان ينهار

 الساعة واحدة الا ربع  بليل و المفروض اكون نمت دلوقتي و المفروض ان النهاردة كان يعدي بسلام زي كل يوم و زي ما خططت بعدت عن الفون و اكاونتاتي معطلة اغلبها و قطعت علاقتي مع الكل او اي حد كان قريب بدرجة كفاية اني اتأثر بوجوده من عدمه و الخطة كانت تمام بقيت اهدا و اتخلصت من حالة كان بقالي كتير محبوسة جواها بقالي كتير لدرجة سنتين تقريبا او اكتر كانت طبعا بعد لحظات الراحة بتيجي بس كنت دايما عارفة انها هتختفي لو مش النهاردة ف بكرة بالكتير.

قد ايه العالم بتاعي ممكن ينهار من اقل موقف او سبب و الاقي نفسي بربط حدث صغير بالم الغربة و ازمة الحريات بس في الحقيقة و علي عكس المتوقع المرة دي كنت اقوي كتير من كل مرة يمكن اللي صدمني اني افتكرت اني مبقاش حاجة قادرة تهد اللي ببنيه و اللي ببنيه مش شئ كبير ابدا زي مه باين من كلامي انا اقصد العالم بتاعي اللي بقدر فيه اتناسي العالم الواقع حواليا و سميها عدم نضج سميها عدم مسؤولية اتس اوكيه بس الظاهر اني مولودة و اليأس في دمي و ادركت بدري اوي انه مفيش اي امل في اي شئ و اننا بنتجه و هنا قصدي علي البشرية كلها نحو الاسوأ طبعا ده كلام مقدرش يعدي علي نفوخي و انا متقوقعة و عالمي الصغير الاهبل مستقر بس بما انها لحظة تصادم مع الواقع ف مفيش مانع امرر الفكرة دي علي عقلي المرة دي لما الوحدة ضربتني ضربة عنيفة من ضرباتها و لقيت الارض بتتهز تحتيا و كل حاجة هتبدأ تتحول سراب كالعادة و لما لقيت الحنين و القلق علي اشخاص فاتوا بيرجع و هيخليني كل مرة اتجه ل شكل من اشكال ادماناتي المتعددة عشان اسكت كل المشاعر التقيلة دي و اللي بتحبسني في حتة احس فيها ان العالم كله في سجن و مفيش اي مهرب او شخص قادر يغير نظرتي قعدت بكل حزن و شغلت انواري و فتحت الكتاب في الحقيقة اول صفحتين كانوا تقال علي قلبي و بدأت اقول ما جدوي الحياة و الكلام اللطيف ده بس خليت ايديا تمرر صفاحته بحبة جهد و قريت شوية حلوين و اه الشعور خف كتير كتير بس هو لسة موجود يعني انا حاسة بيه بس هو قاعد مؤدب عادي مخليني احس بيه بس مش بجرعات في منتهي الحدة عشان يخليني اجري علي اي شئ بسرعة عشان يسكت زي ما اكون اتفقنا نمرر الموضوع بينا ودي انا هستحملك و انت خليك لطيف و بطل هيستيرية زيادة و في الحقيقة اللي لسة مكتشفة اني بكرر اللكلمة دي كتير اوفر مع اني في الحقيقة الحقايق عندي تتعد علي الصوابع و اني ممكن عقلي في لحظة جنون يكدب اني موجودة حتي ف هحاول اغيرها ....انا تهت كنا فين....اااه في الحقيقة انا مش متأكدة ان الموضوع هيمشي ودي كدة كل مرة و في الحقيقة ده بيثير عندي قليل من الخوف اللي ما بيصدق حد يلمسه حتي عشان يعملي حوار ف اتمني اني اعدي الموضوع بسلام كل مرة لاني بالنسبالي الموضوع عدي بخساير اقل من كل مرة بنسبة سبعين في المية مثلا و يمكن اكتر ف انا فخورة بنفسي و احب اقولها ان لحظات الوحدة هتعدي و هترجعي تبقي ممتنة لوحدتك تاني و ان الوحدة هي الوحيدة اللي ارتحنا فيها و انها برضه الوحيدة اللي عرفنا نكون نفسنا و نحس اننا لامسين ارواحنا بجد وان الموضوع دايما هيبقي بالحال دي ف ممكن نعتبرها فرصة لتجربة مشاعر تانية تخلينا ممتنين اكتر لحالتنا الكويسة و نستمتع بيها ببطء و ان مش معني ان اليوم ممشيش النهاردة و انتهي نهاية سعيدة زي امبارح لما مكناش قادرين ننام من الانبساط انه كان يوم سئ بالعكس.

في الحقيقة معرفش برضه حماسي الزيادة عن اللزوم ناحية الكتابة و المدونة ده حماس شباب و لا صادق فعلا بس انا حاسة ان الاتفاق الودي زاد و ان مشاعري بقيت الطف زيادة بعد ما كتبت ف اتمني يبقي صادق و تنضم لملاذ ينور قايمة ملاذتي الكتير اللي ممتنة لكل واحدة فيهم انهم مخليين ايامي اهدأ و اجمل و مخلينني مبسوطة من قلبي اني عايشة لسة و مموتش 

اتمنالك بكرة يوم يعدي بسلام و ترجع بيتك  من غير اي حوارات جايز انا معرفتش افهمك ابدا بس حقيقي لحد دلوقتي لسة طاقة الحب اللي شوفتها فيك قادرة تبهرني و تأكدلي اننا اصررنا علي كوننا بني أدميين ده شكل من اشكال المقاومة تجاه كل القبح بكتب امنيتي جايز في كتابتها احتمال اكتر لتحقيقها

احب اوثق اني في اخر مية صفحة في اولاد حارتنا و انا هكتب عنها بالتقصيل بعدين بس اعتقد عرفة و اللي علي حسب توقعاتي المتواضعة هو المعرفة ترااا العلم بدأ يدخل في الصورة و هيختتم بيها عندي فضول اعرف هينهيها ازاي  و بس اتمني محدش يلاقي المدونة دي لاني مش متأكدة صراحة من ان الموضوع صعب بعني هو اه محدش بقي بيقرأ مدونات كتير و لازم حد يبحث او او ابعتها لحد بس الصدف ممكن تحصل و اتمني تسمحلي المرة دي و متحصلش